كلمات

الفيلم ده انا شفته بالصدفة..

بشكر المذاكرة ال بتخليني أزهق منها ف بقوم أدور على اي حاجه أتفرج عليها في التلفزيون..

بس الفيلم ده مش أي حاجه..

صحيح أنا كنت فاكراه كدة في الأول لأني مسمعتش عنه قبل كده ومفيش حد من الممثلين أعرفهم..

ولم يدفعني أن أتفرج عليه الا جملة"based on true story"ال اتكتبت في بدايته..
لكن بجد الفيلم ده أثر فيا..

في الأول كنت مستغربة ردة فعل ليندا بعدما عرفت بمرضها وانها كانت عادية..

اقصد ب"عادية" انها مبكتش او انهارت او كسرت الدنيا..

لدرجة اني قلت ان الممثله نفسها"Rickie Lake"معرفتش تحس أو توصل احساس الانسان لما بيكتشف مرضه فجأة كده..

بس لما فكرت واندمجت مع الفيلم

اكتشفت ان ده حقيقي وبيحصل كتير..

ساعات الصدمة من كتر ما هي قوية مش بنحس بيها وبنعتقد ان احنا أقوى منها..

ولو حسينا بالضعف نستغرب ونقول ليه ده الأمر مش مستاهل وأنا أقوى منه..

يمكن علشان احساس الضعف والحزن بيخنق ف بنهرب منه..

أو لأننا مش بنحب نصعب على نفسنا..

بس بنرجع في الآخر ننهار لأننا بنمثل القوة على نفسنا وعلى ال حوالينا واحنا مش قدها..

أوقات كتير من الصحي اننا نستسلم للضعف ونبكي ونبوح بمشاعرنا..

يمكن ده ال بيخلينا نبقى أقوياء بعد كده..

وأنا مش بقصد الاستسلام للضعف ان الواحد ينام في الخط بقى ويدخل في اكتئاب وكده..

لأ بس مفيش مانع اني أقول اني حزين واني ضعيف لأني يمكن لما أقول كده ولو لشخص واحد حتى هقدر أواجه حزني وضعفي ده وأتغلب عليه..

مش أفضل أقول ان أنا قوي والمشكلة دي ولا حاجه وأفضل أمثل عالناس وعلى نفسي قبلهم القوة ويفضل الضعف ينخر فيا من جوايا زي السوس وميتبقاش مني غير قشرة خارجية هشة ممكن تنهار في أي لحظة من أقل حاجة..

ليندا بطلة الفيلم حصلها كده ومعرفتش ترجع لحياتها طبيعي غير لما اعترفت لنفسها بمرضها وبدأت تتكلم مع ناس زيها وتعترف بضعفها لنفسها ولغيرها..

ساعتها قدرت تبقى أقوى وترجع تكمل حياتها..

ده من اجمل المعاني ال اتعلمها في الفيلم ده..

وان كنت متعلمتش المعنى ده في حياتي غير من أسبوع تقريبا (تحديدا يوم الأربع الفات)من نصيحه من احد أصدقائي فكان الفيلم الاثبات الفني ليا على النصيحة دي..

طبعا الى جانب المعنى الرئيسي في الفيلم وال قالته ليندا في آخر الفيلم : انه ساعات بتيجي ضربة توقفلنا حياتنا ونقعد نزعل ونعترض عليها بس الضربة دي لما بتوقفلنا حياتنا بتخلينا نبدأ نبص على كل شيء حوالينا من اول وجديد ونعيد ترتيب حياتنا ونقدر الحاجات الحلوة ال فيها..

على فكرة الفيلم سينمائيا عادي جدا..

ليس ذو طريقة اخراج خرافية او موسيقى مؤثرة تحبس الأنفاس..

حتى الأحداث نفسها لا يوجد بها ما يبهرك..

لكنه فيلم ذو معنى ..

و أنا بحترم اي حاجه ليها معنى

بس يارب نقدر نعرف قيمة حياتنا كويس ونبصلها صح من غير ما نحتاج لضربة تيجي وتوقفنا

*********************************************

" عندما تكون الأيام تشبه بعضها بعضا فهذا يعني أن الناس قد توقفت عن ملاحظة الأشياء الطيبة التي تخطر في حياتهم طالما أن الشمس تعبر السماء كل يوم "

- من رواية الخيميائي لباولو كويلو