كلمات

و أخيرا أنشأت مدونة .. ناس كتير اقترحوا الموضوع ده عليا من قبل بس أنا كنت مأجلاه لسببين .. اولهم بقول هو أنا ايه ال هكتبه مهم لدرجة ان الناس كلها تقراه .. أو ايه ال هكتبه مختلف هيفرق عن كل الحاجات الموجوده ع النت .. والسبب التاني ان كل ما احاول انشئ مدونة الأمور تعصلج معايا وأفشل في كدة تماما .. لكن أهو في النهاية قدرت والحمدلله .. وبقيت مدونة على سن ورمح .. مش هقول يارب اكتب حاجات تعجب الناس .. لأن مفيش حاجة بتعجب كل الناس .. لكن هقول يارب ال هكتبه يكون ليه تأثير ايجابي على أي حد يقراه سواء اتفق أو اختلف معايا.. وأهم حاجة يكون للمدونة دي تأثير ايجابي عليا أنا والا مش هيكون ليها لازمة .. ومع اني لازلت متخوفة من حكاية التدوين دي وان كل الناس تقرا أفكاري .. ولا زلت لم أقرر بعد هل هكتب فيها خواطري والحاجات الأدبية ال بكتبها سواء قصائد أو مقالات كان جمهورها بس اصحابي والناس ال اعرفهم ولا هكتب فيها يومياتي والحاجات ال بمر بيها كل يوم ..ولا ادمج بينهم هم الاتنين .. مش عارفة.. زي ما تيجي تيجي بقى .. المهم اننا ببتدي دلوقتي اول مدونة خاصة بيا في حياتي .. يللا نبتدي سوا .. مع اني مش عارفة انتوا مين .. بس يللا نبتدي سوا .. اربطووووووووووووووا الأحزمة .. بسم الله الرحمن الرحيم