كلمات

بحب اللون الأصفر ..

وبحب شكل الناس وهم رايحين الصبح شغلهم ومدارسهم وبيقولوا لبعض صباح الفل ..

وبحب الدوشة ال عالكورنيش في ليالي الصيف ..

وصوت الضحكة وهي طالعة من القلب .. وبحب الدوشة ال قبل الفطار بنص ساعة في رمضان والناس كلهم في المطابخ وصوت الشيخ عبد الباسط عبد الصمد طالع من راديو شقة من الشقق ..

والزحمة بتاعة وسط البلد قبل العيد والناس كلها بتدور على طرحة أو تي شيرت تشتريه للعيد ..

وبحب لما بكون مع صحابي وفاصلين خالص وعمالين نضحك وخلاص ..

وبحب صوت فيروز المبتسم وهي بتقول "آخر أيام الصيفية والصبية شوية شوية وصلت عساحة ميس الريم وانقطعت فيها العربية" ..

وبحب الزحمة في أول يوم للكلية بعد الأجازة واحنا بنسلم على بعض وندور عالجداول والسكاشن ..

وبحب صوت موبيلي لما بيرن وألقاها واحدة صاحبتي بحبها بتتصل بيا ونفضل نرغي للصبح ..

وبحب أقرا حمار من الشرق وأتفرج على فيلم طاقية الإخفا .. وبحب أضحك من قلبي وأنا في عز البكا وبحب أضحك من الفرحة مش عشان أداري دموعي..

وبحب اللون الأزرق ..

وبحب أعمل الموبيل صامت وأنا قاعدة لوحدي عشان ميقطعش عليا هدوئي ..

وبحب النور يقطع عشان أتفرج عالنجوم وهي بتلمع وأسمع صوت الناس حواليا من غير صوت كهربا ولا موتورات ..

وبحب أتفرج عالتلفزيون بليل وأنا طافية النور وموطية صوته خالص عشان أتفرج عالناس وهم بيمثلوا أو بيتكلموا من غير ما أسمعهم ..

وبحب صوت الشيخ الحصري بليل ..

وبحب لما نكون مروحين البيت متأخر والشوارع هادية ومفيش غير صوت رجلينا واحنا ماشيين وصوت جاي من قهوة فاتحة لوقت متأخر ومشغلة إذاعة القرآن الكريم أو أغنية لأم كلثوم ..

وبحب صوت فيروز ال مليان شجن وهي بتقول " لبيروت من قلبي سلام لبيروت " ..

وبحب نور أباجورتي وأنا بقرأ القرآن والناس نايمة ..

وبحب الهدوء ال بيكسو العالم بعد صلاة الفجر أو بعد صلاة العصر ..

وبحب الأحساس ال بيجيني بعدما بشوف فورست جامب أو أقرا حكاية ثقب ..

وبحب دموعي ال بتنزل عشان تريحني لما بكون زعلانة بحب دموعي ال بتنزل من الراحة والرضا والعرفان لربنا بكل نعمه وأنا مش عارفة أشكره ازاي

أصفر وأزرق ..

وحاجات متناقضة كتير بحبها ..

مش فاهمة ازاي ولا هفهم ..

بس ال أعرفه إن الجمال ملوش قانون ولا مقياس وممكن يكون موجود في ألف حاجة وحاجة عكس بعض ..

والمهم إن احنا نحسه ونفهمه مهما كان صغير وبسيط ونحافظ على الرادار ال جوانا ال بيخلينا نندهش ونفرح لما نلاقيه قدامنا

29 ديسمبر 2009